రేపు యువరత్న 'మిత్రుడు' పాటలు విడుదల

యువరత్న బాలకృష్ణ, ప్రియమణి జంటగా నటిస్తోన్న చిత్రం మిత్రుడు. వైష్ణవి సినిమా పతాకంపై శివలెంక కృష్ణ ప్రసాద్ నిర్మిస్తోన్న ఈ ఫ్యామిలీ ఎంటర్‌టైనర్‌ ద్వారా మహాదేవ్ దర్శకుడిగా పరిచయమవుతున్నారు. ఇప్పటికే ఒకపాట మినహా ఈ చిత్రం షూటింగ్ పూర్తయింది. ఈ చిత్రం ఆడియోను ఏప్రిల్ 2న లహరి మ్యూజిక్ ద్వారా నేరుగా మార్కెట్లోకి విడుదల చేస్తున్నట్లు నిర్మాత తెలిపారు. 

బాలకృష్ణ, మణిశర్మ కాంబినేషన్‌లో వచ్చిన చిత్రాలు గతంలో మ్యూజికల్ హిట్స్‌గా నిలిచాయని ఈ చిత్రానికి కూడా మణిశర్మ అందించిన సంగీతం ప్రేక్షకులను ఎంతగానో అలరిస్తుందని నిర్మాత నమ్మకం వ్యక్తం చేశారు. ఇందులో ఆరు పాటలు ఉంటాయని, ఒక పాటను మాత్రం చిత్రీకరించాల్సి ఉందని, త్వరలోనే ఆ పాటను చిత్రీకరిస్తామని ఆయన చెప్పారు.

మరోవైపు నిర్మాణానంతర కార్యక్రమాల్లో భాగంగా డబ్బింగ్ పూర్తయిందని, రీరికార్డింగ్ కూడా ప్రారంభమైందని నిర్మాత వివరించారు. హైదరాబాద్‌తో పాటు మలేషియాలో కూడా ఈ చిత్రం షూటింగ్ జరిపామని, విజయేంద్ర ప్రసాద్ అద్భుతమైన కథకు ఎం. రత్నం చక్కటి సంభాషణలు సమకూర్చారని నిర్మాత వెల్లడించారు. అన్ని కార్యక్రమాలు పూర్తి చేసుకుని ఏప్రిల్ నెలాఖరుకు సినిమాను విడుదల చేస్తామని ఆయన తెలిపారు.